بحاول اغير جلدي..ابرز تصريحات نرمين الفقي ببرنامج اللمة احلي
كتبت: دينا لاشين
حلت الفنانة نرمين الفقي ضيفة في مداخلة هاتفية ببرنامج “اللمة تحلى” على إذاعة شعبي إف أم، وكشفت العديد من الأسرار عن حياتها ومشاركتها كضيفة شرف في مسلسل “الكبير أوي”، وسبب قلة أعمالها الفنية ، كالتالي:
- أول حد لمتى بتحلى معاه أهلي وعيلتى بعد كدة صحابي.
- أنا برتاح مع الناس الطبيعية التلقائية اللي بنحب بعض بجد و من قلبنا.
- أنا مُقلة في أعمالي وده مش بكيفي حسب الأعمال اللي بتتعرض عليا ولأني بنتقي أدواري.
- مفيش فنان بيقعد فى البيت بمزاجه أنا يمكن أقول أن كل اللي بيتعرض عليا حاجات عادية بالنسبالي.
- كل أعمالي أرهقتني أحنا مهنتنا صعبة للغاية وكل عمل بياخد من صحتنا وعمرنا وبياخدنا من أهالينا ومن حاجات كتير اوى وأفتكر كنت بعمل اخر جزء في مسلسل “نصيبى وقسمتك” كنا بره بيتنا حوالي 36 ساعة وفي “أبو العروسة” من التعب بعد ما خلصت روحت المستشفى.
- بحاول أغير جلدي وأعمل أدوار متنوعة وحاولت بشتى الطرق أنى أبين موهبتى حسب العمل اللي بيتعرض عليا.
- كذا حاجة ممكن تكسرني لو اخترت بنى ادم سليط اللسان أو ممكن يمد أيده عليا أو أن الراجل المرتبطة بيه يحسسك أنك ولا حاجة كل ديه حاجت تكسر أى ست.
- أمي الله يرحمها كانت بطفش العرسان مني لانها كانت متعلقة بيا وكانت صاحبتي أوى وتحولت إلى بنتي.
- اتبسطت أوى بمشاركتى كضيفة شرف في “الكبير أوي 6” واستمتعت استمتاع غير طبيعي والكاست كان حلو أوى كل الناس كانت هايلة.
- أحمد مكي جواه تلقائي وفنان موهوب وكان نفسي أكمل أكتر في المسلسل.
وتصدرت النجمة نرمين الفقي موقع التغريدات “تويتر” واحتلت الاكثر تداولا فور ظهورها كضيفة شرف ضمن أحداث الحلقة الثالثة عشر من مسلسل “الكبير اوي”
، وأشاد الجميع بأدائها التمثيلي، وبدأت أحداث الحلقة 13 من مسلسل الكبير أوى 6، بخناقة حزلقوم “ أحمد مكى” مع أمجاد “ أسماء جلال” بعد استرجاعها ذكريات زواجهما، وأنه السبب فى خروجها من الجروبات الداعمة للمرأة بسبب ضرب حزلقوم إحدى صديقاتها.
وتتوالى الأحداث في إطار كوميدي بمقابلة حزلقوم للنجمة نرمين الفقي، التي ظهرت كضيف شرف في المسلسل بشخصيتها الحقيقية، لتقدم دور طليقة حزلقوم، ويظهر في المشهد حزلقوم ونرمين الفقى وهدرس.
ويشارك في بطولة العمل كل من: أحمد مكي، الوجه الصاعد رحمة أحمد، محمد سلام، بيومي فؤاد، هشام إسماعيل، سما إبراهيم، محمد أوتاكا، ليلى عزالعرب، مصطفى غريب، حسن القناوي، علاء زينهم، حسين أبوحجاج، وضيوف الشرف ماجد الكدوانى، وحمدي الميرغني، ونرمين الفقي، وأسماء جلال، وسليمان عيدو وآخرين، وتأليف مصطفى صقر إخراج أحمد الجندي.
