طارق الشناوى يهاجم هنيدي ومصطفى قمر ويكشف عن رأيه فى سفاح الجيزة .. تفاصيل
حل الناقد الفني طارق الشناوي ضيفاً على برنامج “ET بالعربي”،
حيث هاجم محمد هنيدي مطالباً إياه بالبحث عن نجم كبير لمشاركته أعماله في المرحلة المقبلة،
كما هاجم فيلم “أولاد حريم كريم” لمصطفى قمر كاشفاً السبب الحقيقي لإعتذار ياسمين عبد العزيز عن عدم المشاركة فيه.
طارق الشناوى يهاجم محمد هنيدى
وقال الشناوي: “الفنان محمد هنيدي بحاجة للابتعاد في الفترة المقبلة عن البطولة المطلقة،
وعليه أن يفكر في بطولة مشتركة مع كريم عبد العزيز أو أحمد عز، والذهاب الى دائرة أدوار أخرى”.
كما وأضاف: “فكرة إن محمد هنيدي يبقى البطل المحوري ورقة وانتهت، وبقوله العب بقى في سكة تانية
وتعمل عمل فني أنت أحد الأبطال ومش شرط تبقى البطل الأول وإذا راح السكة دي ممكن يبقى عنده زمن تاني في السينما”.
بينما تابع: “محمد هنيدي وعد جمهوره قبل “مرعي البريمو”، وزود أوي سقف التوقعات،
والواقع كان هزيلاً ومفيش فيه شيء جديد ولا مختلف، والفيلم في أسوأ حالات المخرج والكاتب والنجم والعناصر كلها مجتمعة أدت للفشل الذريع للعمل”.
بينما أكمل: “هنيدي بيدخل الفيلم وعنده قناعة إن الناس هتضحك، الجمهور مبقاش بيضحك علي اللي كان بيضحكه قبل كده،
ومعدش هنيدي هو هنيدي اللي قبل كده، والوهج الداخلي اللي عند هنيدي انكسر، وقبل كده فيلم “نبيل الجميل أخصائي تجميل”
نفس الكارثة بس الكارثة المرة دي أكبر، بس نفس الحكاية إنه بيعتقد إن الناس بتضحك والإفيهات بتجيب مفيش حاجة بتجيب
وكل الممثلين في “مرعي البريمو” في أسوأ حالاتهم زي غادة عادل وعلاء مرسي”.
رأى طارق الشناوي عن فيلم أولاد حريم كريم
وعن فيلم “حريم كريم” لمصطفى قمر قال طارق الشناوي: “فيلم “أولاد حريم كريم”
من أسوأ الأعمال الفنية على الرغم من أن مخرجه علي إدريس مخرج مهم، وزينب عزيز كاتبة مهمة،
ولكن اللي عملوه ملهوش علاقة بالجزء الأول، ولا فن السينما اللي بنعيشه دلوقتي وتراجع لزمن ما قبل الجزء الأول”.
كما أضاف: “مشكلة مصطفى قمر إنه عايش على الزمن القديم، المطرب بيتعمل له أفلام إزاي؟
نرجع لأم كلثوم لما بتنجح بيتعملها فيلم، وعبد الحليم حافظ لما عمل أغنية “على قد الشوق”،
فاتعمله فيلم مع شادية لإنه كان ناجح كمطرب، ولما بتفشل كمطرب مش هتصعدك السينما والسينما بتروح للبريق مش هي اللي بتعطيك بريق،
مصطفى قمر في عز فشله كمطرب قرر إنه يعمل الفيلم واللي اشتغل معاه الجزء الثاني الحريم اللي مش مطلوبين أوي في السينما”.
السبب الحقيقى لـ إعتذار ياسمين عبد العزيز عن فيلم أولاد حريم كريم
وعن السبب الحقيقي لاعتذار ياسمين عبد العزيز عن عدم المشاركة في الفيلم، قال طارق الشناوي:
“ياسمين عبد العزيز الوحيدة اللي لها وهج واسم ورفضت تكون موجودة مع مصطفى قمر في “أولاد حريم كريم”،
قالت لأ لإنها مش هتبقى موجود كنصف بطلة أو خُمس بطلة… كتابة “أولاد حريم كريم”
قديمة أوي والتفاصيل معدتش تجيب ولا تضحك، ومصطفى قمر افتقد الوهج وفق نجاحه وبيمثل الدور من غير حالة من الوهج والشغف، بيؤدي فقط حافظ مش حابب”.
رد مصطفى قمر على طارق الشناوي
وهاجم مصطفى قمر الناقد عبر انستجرام قائلًا: “هو أنا مش طلبت منك تبعد عني أصلًا
وماتتكلمش عني علشان ماتتهزأش طيب انت اللي جيبته لنفسك عموما ياللي اسمك طارق انت كاتب كلام اهبل
يدل للمرة المليون انك ماشفتش الفيلم وعموما اللي حيرد عليك جمهور السينما الحقيقي
اللي دخل الفيلم اللي مالوش دعوة بالنفاق او مصلحة اي فيلم تاني (فكرني كدة شغلتك ايه….؟…. هي من اريع حروف بيتهيألي”.
طارق الشناوي ومسلسل سفاح الجيزة
وقال خلال لقائه ببرنامج «et بالعربي»: «اللي أنا شفته للحلقة الرابعة،
هو فقط مبرر أن العنف والدموية اللي عند البطل أنه شاف أمه بتقتل أبوه، العمل الفنى
اللي بس هيحكي عن القاتل تستمتع بيه في اللحظه، بعد ذلك لا نستعيده، ونستعيد الأعمال عندما يكون بها وجهة نظر فكريه أبعد».
تابع: «أنا لغاية الحلقة الرابعة مشوفتش البعد ده، بتفرج على المسلسل مجرد مشاهدة،
وجاذبني شغل المخرج وتفاصيل الإضاءة والموسيقى والديكور، طيب
فيما بعد الجانب الفكري ايه اللي عايز يقوله، لسه مقالوش لدلوقتي ممكن يظهر بعد كده».
واستكمل «الشناوي» حديثه قائلا: «احمد فهمي هيطلع من المسلسل ده بنجاح مضاعف،
لسه كان عامل فيلم مستر اكس وناحج نجاح سينمائي وتليفزيوني ده مقابل هيعمله نقله كبيرة،
وفي «سفاح الجيزة» عامل دور في قدر كبير من الإبداع كفن أداء ممثل، عنده هدوء وارتياح،
وفي علم النفس في حاجه اسمها الثبات الانفعالي وده اللي التزم بيه أحمد واللي هي جزء حميم جدا من تكوين الشخصية،
وده قوة البطل هنا، الجرائم دي كلها وراها حد مخطط وعارف هيعمل ايه، ولك وشه مفيش فيه أي ملامح وده اللى خلاه يخدع كل هؤلاء».
